Dous feridos leves ao chocar dous camións da mesma empresa nunha pista de Vilar de Barrio
No lugar, os axentes da Garda Civil comprobaron que se trataba dunha colisión por alcance entre dous camións da mesma empresa nunha pista que une a N-525 coa localidade de Bóveda, en Vilar de Barrio.
Por Europa Press / Redacción | OURENSE | 30/04/2024 | Actualizada ás 14:37
O condutor e o seu acompañante resultaron feridos de carácter leve ao chocar o camión co que circulaban por unha pista en Bóveda, en Vilar de Barrio, contra outro camión da mesma empresa. Segundo informou a Garda Civil, o suceso tivo lugar ás 9.40 horas nunha pista asfaltada desta localidade e ao lugar desprazouse unha ambulancia e unha dotación de bombeiros de Xinzo de Limia.
No lugar, os axentes comprobaron que se trataba dunha colisión por alcance entre dous camións da mesma empresa nunha pista que une a N-525 coa localidade de Bóveda, en Vilar de Barrio. A ambulancia do 061 trasladou ao condutor e ao acompañante ao Complexo Hospitalario Universitario de Ourense (CHUO) con prognóstico leve. Os condutores deron negativo na proba de alcoholemia.
